بوسن روڈ پر ہیلمٹ آگاہی ریلی، خواتین بائیک رائڈرز کی بھرپور شرکت

ملتان: سٹی ٹریفک پولیس ملتان کی جانب سے بوسن روڈ پر ہیلمٹ آگاہی بائیک ریلی کا انعقاد کیا گیا، جس میں خواتین بائیک رائڈرز کی بڑی تعداد نے بھرپور شرکت کی۔ ریلی کی قیادت چیف ٹریفک آفیسر (سی ٹی او) ملتان محمد نبیل کھوکھر نے کی۔

ریلی کے دوران سٹی ٹریفک پولیس کی جانب سے شہریوں، بالخصوص خواتین کو روڈ سیفٹی اور ہیلمٹ کے لازمی استعمال سے متعلق آگاہی فراہم کی گئی، جبکہ شرکاء میں روڈ سیفٹی سے متعلق بروشرز بھی تقسیم کیے گئے۔

اس موقع پر سی ٹی او محمد نبیل کھوکھر نے کہا کہ موٹرسائیکل چلاتے وقت ہیلمٹ کا استعمال انسانی جان کے تحفظ کے لیے انتہائی ضروری ہے۔ انہوں نے شہریوں پر زور دیا کہ وہ موٹرسائیکل چلاتے وقت ہیلمٹ کا لازمی استعمال کریں۔

انہوں نے کہا کہ ریلی کا مقصد خواتین میں روڈ سیفٹی اور ہیلمٹ کے استعمال کے حوالے سے شعور اجاگر کرنا ہے۔ خواتین کو بااختیار بنانا سٹی ٹریفک پولیس کی ترجیحات میں شامل ہے، اور محفوظ سفری ماحول کے لیے آگاہی سرگرمیوں کا سلسلہ جاری رکھا جائے گا۔